Wen sech fir d’Debatt ëm d’Ofdreiwung an der Chamber am November an am Dezember 2012 interesséiert huet, den wees bestëmmt och nach, datt et den Dag vun der Ofstëmmung virun der Chamber zwou Demonstratiounen gouf – eng vun Leit déi fir eng Fristeléisung bei der Ofdreiwung militéiert hunn an eng vu Leit déi géint d’Ofdreiwung agetrueden sinn. D‘Géigner vun der Ofdreiwung woren Memberen vun enger chrëschtlecher Associatioun déi zu Bréissel hire Siège huet: „Pro Europa Christiana“. Déi chrëschtlech Demonstranten hunn friddlech demonstréiert, Tracten ausgedeelt a Cartonsdoudelueden virun der Chamber opgestallt fir drunn ze erënneren dat bei all Ofdreiwung e Kand stierft. Alles Saachen déi an enger Demokratie vollkomme legitim sinn an duerch d‘Mënscherechter op Meenungs- an Demonstratiounsfräiheet ofgesëchert sinn.
Verschiddener vun de Pro-Ofdreiwungsdemonstranten hunn déi Rechter vun denen Leit déi aanecht denken wéi si selwer awer net respektéiert. Si hunn d’Demonstratioun vun den Ofdreiwungsgéigner gestéiert a probéiert fir d‘Cartonsdoudelueden ze zerstéieren. Fir mech wor dat op e Neitst e Beweis fir d‘Intoleranz vun engem Deel vun der politesch lénker Szen hei am Land. Aaner Meenungen wéi hir eegen gi net nëmme net toleréiert, mä et gëtt och nach probéiert fir denen hir Vertrieder a Symboler kierperlech unzegräifen, respektiv ze zerstéieren. Vun dëser Plaz aus nach eemol e Merci un eis Police dat si agegraff huet an déi friddlech, chrëschtlech Demonstranten geschützt huet.
Meng perséinlech Sympathie gëllt selbstverständlech den Ofdreiwungsgéigner. Ech sinn bei si gaangen an hunn hinne Merci gesot fir hir Präsenz. Deemools wéi haut freeën ech mech dat si de Wee op Lëtzebuerg fonnt hunn. Meng Dankbarkeet a meng Solidaritéit mat denen Demonstranten hunn vill Leit rose gemaach. Haut wéi deemools halen ech awer mäi Schrëtt fir richteg. Wann een bannen an der Chamber géint eng Liberaliséierung vun der Ofdreiwung antrëtt, dann wär et jo wuel net ganz logesch wann een Demonstranten déi virun der Dir fir op mannst tendenziell ähnlech an eventuell bis hin zu dene selwechten Iddien demonstréieren, géif ignoréieren.
Ech wëll, well dat deemools vun Eenzelnen insinuéiert gouf, och hei nach eemol soen, dat ech net Member vun „Pro Europa Christiana“ wor oder sinn (fir d’Zukunft schléissen ech dat awer net méi definitiv aus), nach déi Leit geruff hat fir hei ze demonstréieren. Fir déi Associatioun „Pro Europa Christiana“ als „Sekt“ ze protraitéieren, wéi eenzel Journalistinnen dat probéiert hunn, halen ech fir einfach absurd. Menges Wëssens feelt dozou all Grondlag. Genee sou absurd ass et beim Aerzbistum Lëtzebuerg nozefroen, ob déi belge ONG bei hinnen „unerkant“ wär, grad sou als hätt den Aerzbistum Lëtzebuerg iwwer d’Unerkennung vun enger privatrechtlecher ONG mat Siège zu Bréissel ze befannen oder als wär „Pro Europa Christiana“ en Deel vun der Lëtzebuerger, kathoulescher Kierch. Mä gutt, iwwer den notoresch tendenziösen Journalismus zu Lëtzebuerg maachen ech mir souwisou schon laang keng Illusiounen méi.
Méi interessant ass wéi vehement Verschiddener op déi Demonstranten an hir Doudelueden reagéiert hunn. Vill Leit maachen jo sou, als geng bei enger Ofdreiwung kee Kand stierwen, mä eppes aanecht, eppes nach–nët-mënschleches. Wen d’Rieden an der Chamber analyséiert, fënnt dann och sou ëmschreiwend a verharmlosend Ausdréck fir d’Kand wéi zum Beispill „d’Schwangerschaft“, „et“, „contenu utérin“ etc., an dout maachen heescht do op Politesch-korrekt „wech maachen“. Eng Schwangerschaft déi a Wierklechkeet definitiv ofgebrach gëtt, gëtt an der Chamber verbal nëmmen „ënnerbrach“, grad sou als kéint een no der Ofdreiwung iergend wéini nach domat virufueren. Dat e Kand stierft, gëtt einfach ënnert den Teppech gekiert. Déi Doudelueden hunn vill Leit op eng drastesch Manéier mat enger fir si onbequemer Wouerecht confrontéiert, dowéinst och hir Roserei. Méi déif an d’Psychologie vun där Debatt wëll ech lo mol nach guer net eraklammen.
Eis Medien hunn natierlech unisono – wéinstens sou wäit ech wees – ausschliesslech déi Demonstranten kritiséiert déi fir d’Recht op Liewen manifestéiert hunn. Dat si friddlech waren, déi aner Säit dat awer bedeitend manner wor, dat war hinnen kee Kommentar wäert.
Sou e Blog wéi den hei gëtt net vu ganz ville Leit gekuckt. Trotzdem sinn ech et der Wouerecht, anere Leit a mir selwer schëlleg, fir e klengen Deel dozou bäizedroen dat méi Objektivitéit an d’Debatt era kënnt.
Dowéinst wëll ech d’Verhalen vun dräi Politiker an der Ofdreiwungsdiskussioun hei oppen kritiséieren. Natierlech geet et mir hei just ëm Declaratiounen oder Aktiounen déi si am Kader vun hirer ëffentlecher, politescher Aarbecht gemaach hunn. Kommentaren iwwer d’Privatsphär vun aneren Leit geng ech mir net erlaben.
- Den Här Jacques-Yves Henckes (deemools nach ADR) huet den 28. November 2012 op RTL erklärt, dat hien déi Leit déi géint d’Ofdreiwung manifestéiert hunn, als „schwéier geeschteg Kranker“ consideréiert.
Ech fannen sou eng Ausso vollkommen inakzeptabel. Et ass net nëmmen eng gewollte Respektlosegkeet fir Leit déi eng aner Meenung vertrieden, mä et ass och eng Respektlosegkeet géintiwwer all dene Leit mat geeschtegen, gesondheetleche Problemer, hire Fammilljen a Frënn a bei all denen Persounen déi si versuergen an hinne medizinesch hëllefen. Ech kann weder akzeptéieren nach toleréieren, dat Krankheeten a mënschlech Schicksaler als pejorativ Bezeechnungen géint politesch Géigner mëssbraucht ginn.
2. An Däitschland gëtt et eng kleng Partei déi heescht « Christliche Mitte ». Si huet eng Internet-Säit (www.christliche-mitte.de) op där dësen Artikel iwwer den Här Eugène Berger (DP) publizéiert gouf :
« Antwort eines Abgeordneten
Montag, den 07. Januar 2013 um 14:20 Uhr
Anlässlich der Abstimmung des luxemburgischen Parlamentes über die Liberalisierung der Abtreibungsgesetzgebung am 22.11.12 schrieb ich an den Abgeordneten Eugene Berger von der Demokratischen Partei folgende Mail:Sehr geehrter Herr Berger,ich habe heute erfahren, dass das luxemburgische Parlament am 22.11.12 über die Ausweitung der Abtreibung in Luxemburg abstimmt. Bitte bedenken Sie Folgendes:Würde Ihre eigene Mutter wünschen, dass Sie für eine Ausweitung der Abtreibungsgesetzgebung stimmen? Was würde Ihre Mutter dazu sagen?Ich bitte Sie herzlich, für das Leben – damit auch für die luxemburgische Gesellschaft – zu stimmen.
Herzliche Grüße, Thomas Rickel, Bielefeld (Deutschland).
Die Antwort ist ebenso erstaunlich wie unglaublich. Herr Berger mailte zurück:
Religiöser Fundamentalist! Fuck You!
Am 22.11.12 wurde der Gesetzentwurf für die Liberalisierung der Abtreibung in Luxemburg, d.h. die „Fristenlösung mit Beratungspflicht“, angenommen – mit 99% der Stimmen von der Christsozialen Partei (CSV). »
Et gouf eng Zäit, an där d’Demokratesch Partei nach fir Fräiheet an Toleranz agetrueden ass. Deemools wor si nach keng Lénkspartei, mä eng liberal Partei. Et gouf och nach eng Zäit wou och d’DP nach eng gewëssen Héiflechkeet am Emgang mat de Leit hat. Déi Zäiten sinn anscheined riwwer.
3. Den Här Justin Turpel, Stater Gemengerot vun der Partei « déi Lénk », huet während der Demonstratioun virun der Chamber mat Kräid Hakekräizer op de Buedem virun d’Demonstranten vu « Pro Europa Christiana » gemoolt. Dat gouf gefilmt an et fënnt een déi Dokumenter op gloria.tv.
Esou Gesten fannen ech einfach skandaléis. Et woren d’Nazien déi Ofdreiwungen an engem groussen Ausmooss bedriwwen hunn, déi Milliounen vu scho gebuerenen Mënschen ermuerd hunn an d’Räich vum Dout a vum Terror symboliséieren. D’Chrëschtentum setzt sech dogéint fir d’Léift an de Schutz vum Liewen an, also just fir dë Géigendeel vun dem wat duerch en Hakekräiz symboliséiert gëtt. Et ass moralesch inakzeptabel, historesch falsch an am héchste Moos intellektuell onéierlech fir chrëschtlech Demonstranten déi fir de Schutz vum Liewen demonstréueren wëllen an ën Zësummenhang mat nationalsozialisteschen Iwwerzeegungen ze réckelen.
Ech kann iwwerhaapt net novollzéien, wisou déi Lëtzebuerger Press dësst Verhalen vum Här Turpel onkommentéiert léisst. Ass si ieren um lénken A blann, wann et ëm Intoleranz a Mënschenveruechtung geet ? Et muss een dat bal färten!
Déi Debatt ëm d’Ofdreiwung an alles wat rondrëm geschitt ass, bleiwt fir mech ë Schlësselereignis a mengem Liewen. Dësen Artikel beschreiwt en Deel vun den Uersaachen. Eist Land huet vill Suergen a Problemer, finanzieller a sozialer ganz secher, mä leider och ganz vill moralescher.