An dem Artikel iwwer d’Doudelueden virun der Chamber hat ech an Erënnerung geruff, dat do eng friddlech Demonstratioun vun enger chrëschtlecher Nët-Regirungsorganisatioun vu lénken a feministeschen Demonstranten gestéiert gouf. Eenzel lëtzebuerger Politiker hunn d’Chrëschten déi sech géint d’Ofdreiwung ausgeschwat hunn och verbal beleedegt.
Doropshin huet eng Damm mir geschriwwen, déi mech op en ähnlechen Tëschefall zu Wien opmierksam gemaach huet – just dat d’Evenementer an Eisterräich nach e ganz anert Ausmooss haten. Zu Wien hat eng Grupp vu Chrëschten e Gebietszuch vum Stephansdom bis zu der Staatsoper organiséiert fir wéinst enger Homosexuelle-Parad ze béissen a fir de Schutz vun der traditionneller Famill ze demonstréieren. Fir mech ass ganz kloer, dat esou eng Demonstratioun ënnert d’Reliouns- an d’Meenungsfräiheet fällt a muss vu jiddferengem toleréiert ginn – egal ob een lo gleeweg ass oder net an ob een eng geliewten Homosexualitéit lo als Sënn wëll gesinn oder nët. Dat ass Glaawenssaach, mä de Glaawen ass an eise Gesellschaften fräi a muss respektéiert ginn.
Dee Gebietszuch – den gläichzäiteg eng friddlech Demonstratioun war – gouf awer massiv gestéiert. E Film den dat weist, ass Deel vun dësem Artikel. Fir mech ass et op jiddefall traureg ze gesinn, dat ausgerechent Leit déi sech – zu Recht – op d’Toleranz an op d’Fräiheet beruffen wann et em d’Vertriedung vun hirem eegenen Uleies geet, sou intolerant mat de Meenungen vun aaneren ëmginn.
Nodeems ech den Artikel « Homo-Bestietnis – Neen, Merci ! » op dësem Blog publizéiert hat, huet et net un haasserfëllten Kommentaren, virun allem op « facebook » gefeelt (« Waart du nëmmen, du houeren Kartheiser ») etc… Mol dovun ofgesinn, dat sou Kommentaren munches iwwer den intellektuellen Niveau an déi moralesch Qualitéiten vun hiren Auteuren soen, weisen si och, dat et a Punkto Toleranz och hei am Land manifest Defiziter gëtt.
Ech hoffe jiddefalls, dat mir hei am Land eng Debatt iwwer d’Homosexuellebestietnis kënne féieren, déi sech op engem anere Niveau bewegt wéi dat do. Ech wënsche mir géigeseitege Respekt an e Mindestmooss un Héiflechkeet , och wann d’Positiounen sech diametral géintiwwerleien.