„Déi Lénk“ an hir Frënn

Bei eis am Land probéieren  «déi  Lénk » sech jo als eng respektabel Partei ze presentéieren.  Datt dat zum Deel gelongen ass, huet ganz secher och mat der Perséinlechkeet vum Här Professer Hoffmann ze dinn.  D’Fro stellt sech awer wéi eecht hir Trennung vun der Lëtzebuerger Kommunistescher Partei (KPL) an hir proclaméiert Distanz zu hirer kommunistescher Vergaangenheet ze huelen sinn.

Eng Aentwert dorop kann ee vläicht bei Wikipedia fannen. Do steet, datt « déi Lénk » Member am « Parti de la Gauche européenne » sinn. An do sinn oder woren, ënner aneren, dëss Parteien  Member (Stand 2010) :  Kommunistische Partei Oesterreichs, Parti communiste (Belgique – Région wallone), Kommunistische Partij (Belgique – Région flamande), Partido Comunista de Espana, déi finnesch kommunistesch Partei, de Parti communiste français, den italieneschen Partito della Rifondazione Communista, d’Partei vun de moldaveschen Kommunisten, wéi och d’Kommunisten aus San-Marino a nach anerer. Als « Observateuren » sinn ageschriwwen déi « Deutsche Kommunistische Partei », de «Partito dei Communisti Italiani » an déi tscheschech Kommunisten « aus Béimen a Moravien ». An doniewent nach eng ganz Hickecht vu lénkssozialisteschen bis zu trotzkisteschen Bewegungen. No enger klorer Trennung tëschent eise « Lénken » an de Kommunisten gesäit dat do eigentlech net aus. Déi Lëscht do liest sech éichter wéi den Horrorkatalog aus den Zäiten vum Kale Krich. Mat Demokratie hunn déi do Herrschaften wahrscheinlech och net vill um Hutt. Déi Lëscht  klengt éichter wéi dë Personalregëster vum Archipel Gulag.

E richtege Programm fënnt een op dem Site vun dene Lénken iwwregens och net. Och keng Erklärungen zu hirer Vergaangenheet oder hirem Verhältnis zum Kommunismus. Just e puer Schlaagwierder, e puer schwammeg Sammelbegrëffer, vill allkommunisteschen Kampfjargon,  bëlleg Stroossenrhetorik, mä bal näicht Konkretes. Wat « déi Lénk » da sou genee mat de Leit génge maachen wann si an d’Verantwortung kéimen, dat soen si dem Wieler wuel léiwer net. Ech wär jiddefalls frou wann « déi Lénk » mol géngen erklären, wéi si haut zu all hiren gudden, alen Genossen an Europa stinn. Et ass schwéier ze verstoen, dat si hei am Land sou maachen als wéilten se mat de Kommunisten a mam Kommunismus näicht ze dinn hunn, mä datt dat awer iwerall soss an Europa hir beschte Kollegen sinn. Iwwregens ass och déi däitsch « Die Linke » an hirem noblen Veräin – eng Partei déi hir Wuerzelen ënner anerem  an denen  Hären Ulbricht an Honecker hirer SED huet.

 

Dieser Beitrag wurde unter Allgemein, Europa an d'Welt, Lëtzebuerg, Politik veröffentlicht. Setze ein Lesezeichen auf den Permalink.

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.