Déi konservativ Säit

Sëcher, mir all brauche nach e puer Deeg  fir genuch Ofstand vun dëse Walen ze kréien fir kënnen eng eengermossen anstänneg Analys ze maachen. Mee wann ech mir dat eent an dat anert sou unhéieren, froen ech mech awer ëmmer nees ob den Här Juncker net duerch säin Ego-Trip seng ganz Partei an déi babylonesch Gefaangeschaft bruecht huet?

Den Här Juncker huet Feler viirsätzlech a bewosst gemaach fir déi all Beamten disziplinaresch a vläicht souguer penal verfollegt gi wär. Création d’un emploi fictif op Staatskäschten ass zum Beispill a mengen An en détournement de fonds publics, an dat och nach zum Viirdeel vun engem Här vun dem sengem Kand den Här Juncker Pätter ass. Nennt ee sou e Verhalen net Nepotismus?  Ass dat net den Ausdrock vun der Arroganz an der Allmacht vun engem Politiker a vun enger Partei déi mengen, datt de Staat geng hinne gehéieren? Ech hunn dem Här Juncker den 10. Juli ganz gutt nogelauschtert. Hie wor net Affer, mee Täter.

Wann den Här Juncker déi Gréisst gehat hätt fir zouzeginn, datt hie Feler gemaach huet, wann hien doropshin zréckgetruede wär a säi Posten engem anere ginn oder och nach Neiwale proposéiert hätt, dann hätt hien als e groussen Här dogestaan. Moralesch Gréisst gëtt ëmmer unerkannt. Mee hien huet eis politesch Kultur mëssuecht well hie seng Verantwortung als Minister net wollt droen – zum Schued vun der Glaafwierdegkeet vun der Politik a vun onsem Land. Den 10. Juli huet den Här Jucker d’Chamber iergefouert. Den Här Mosar huet sech geflass nom Här Juncker senger Erklärung ganz, ganz séier d’Glack ze lauden an den am viraus organiséierten Szenario huet no engem CSV-Dréibuch däerfen oflafen.         

Als éicht gouf d’CSV mol a Sippenhaft geholl : « Mir mam Premier ». Eng parteiintern Diskussioun wor net erwënscht, Dissidente goufe net toleréiert. Ech hunn eppes géint de Führerprinzip, an der CSV ass den awer offensichtlech zur Parteiraison erhuewe ginn. Déi Neiwalen vum 20. Oktober hunn d’CSV dunn och nach 3 Mandater kascht. Hätt den Här Frieden d’Regierung nom 10. Juli viru geféiert, wär et mol jiddefalls net kuerzfristeg zu sou engem Verloscht komm. D’CSV hätt sech kënnen nei opstellen am Hibléck op d’Walen am Mee oder Juni 2014.

An dene leschte Méint huet den Här Juncker schonn nees d’Geleeënheet verpasst fir seng eege Nofolleg ze organiséieren. D’CSV ass awer net do fir dem Här Juncker ze déngen, mee den Här Juncker soll senger Partei déngen. Bei de Walen, huet hie perséinlech och nach e grousse Stëmmeverloscht erlidden. Fir mech wor dat e weidert Indiz dofir, datt den Här Juncker lues a lues zu enger Belaaschtung fir seng Partei gëtt. A wat ass d’CSV da wierklech nach no all dene Juncker-Joeren ? E Muechtapparat ouni programmatesch Substanz. Sou eppes léisst sech op Dauer net erhalen.

Den Här Juncker kann sech als Politiker sëcher nach e puer Joer iwwer d’Distanz retten wann hie net wëll fräiwëlleg goen, mee seng Zäit ass awer riwwer. Den Ufank vum Enn läit schonn hannert him.

Sollt et wierklech lo och nach zu enger Dräierkoalitioun kommen, dann ass de Fiasko fir d’CSV komplett. Wëll d’CSV da wierklech nach weider vun dem Mann geféiert ginn, dee si duerch seng Verantwortungsverweigerung an déi do Situatioun era manövréiert huet ?  Soll den Här Juncker dann nach d’Zukunft vun där Partei bei denen nächste Walen am Joer 2018 representéieren?  Et gëtt Zäit fir e Wiessel bei der CSV ! Personell op jidde Fall a programmatesch och. Eng CSV mat bal dem selwechte Programm wéi d’LSAP, d’DP an déi Gréng huet sech souwisou op hirem Wee veriert. Dat grousst Schëff CSV brauch e neie Kapitän!

No de Walen ass virun de Walen! Haut stëmme mir of: wëlle mir eis Traditiounen erhalen (Lëscht 1) oder eis dee politesch korrekte Maulkuerf undi loossen (Lëscht 2)?  

Eis Frënn an Holland (eigentlech dem „Niddrege Land“- Nederland) hu lo Problemer mat „Zwarte Pit“, dem „Père Fouettard“, dem Houseker héchstperséinlech. Hien ass schwaarz, ass béis mat de Kanner an hie muss stoen wann dee wäisse Kleesche sëtzt.  E Fall fir d’Mënscherechtskommissioun vun der UNO!

http://www.rtl.be/info/belgique/societe/1041587/edito-saint-nicolas-est-il-raciste–

Där Fäll vu gravéierendem Rassismus a Sexismus gëtt et nach. Firwat z.B. ass dee béise Kropeman ë Mann an net paritéitesch all zweet Joer eng Fra? Ass de Kropemann e Wäissen oder kann en och asiatesch oder afrikanesch Originen hunn?

Ech mengen, d’UNO kritt nach vill Aarbecht bis och dee leschte Recht vun eisen Traditiounen zerstéiert ass.

D’Fro u sech firwat den Houseker sou ausgesäit wéi en ausgesäit ass iwwregens ethnographesch net oninteressant. Symboliséiert hien d’Sënn? Aner Leit wëssen doriwwer secher vill Interesssantes ze erzielen 

Iwwregens, ech wielen d’Lëscht 1, déi vum schwaarzen Houseker!

D’Wale si riwwer an déi politesch Aarbecht geet virun. Perséinlech hunn ech mech och doriwwer gefreet, datt  d’ADR zwar leider numeresch méi schwaach ass wéi bei dene leschte Walen, awer inhaltlech geschloss a bedeitend gestäerkt. Bei aller Ennerschiddlechkeet an de Perséinlechkeeten sinn ech iwwerzeegt, datt déi nei ADR-Equipe an der Chamber engagéiert, frëndschaftlech an efficace zësummeschafft. 

Eent vun eise Ziler heescht  jo manner Staat – méi Fräiheeten. Dat hu virun eis och schonn aner Leit geduecht a gesot, dorënner och een dee mir als Mënsch, Schauspiller a President ëmmer ganz sympathesch wor: 

No engem heiansdo opreegenden Waldag wëll ech all dene ganz häerzlech Merci soen, déi menger Partei an/oder mir perséinlech hirt Vertraue an hir Stëmm geschenkt hunn. Dat ass e ganz wäertvolle Cadeau a, genee sou wéi de Gast Gibéryen an de Roy Reding,  wëll ech mech no beschtem Wëssen a Gewëssen beméie fir dem Vertraue wierdeg ze sinn.  

 http://wahlen.rtl.lu/resultater/national/

Dësem Message schléissen ech mech selbstverständlech voll a ganz un.

Zousätzlech wëll ech awer nach e puer Saache soen, déi mir um Härz leien.

540 Leit hunn sech als Kandidaten opgestallt. Mat 480 vun hinnen sinn ech zwar politesch net d’accord, mee hinnen all soen ech Merci dofir, datt si Courage bewisen hunn, an duerch hire perséinlechen Asaz zu enger méi lieweger Demokratie hei zu Lëtzebuerg bäigedroen hunn.   

All dene Leit déi Ziedelen ausgedeelt, Plakater opgeriicht an op honnert aner Manéieren  hire Parteien aus Idealismus gehollef hunn ouni dofir kënnen eng Belounung ze erwaarden, soen ech Merci. Och si loossen eis Demokratie liewen.

Ganz besonnesch natierlech soen ech dene léiwe Frënn vun der ADR Merci, besonnesch all denen déi als Kandidat ugetrueden oder soss fläisseg mat gehollef hunn.  Ech hoffen, datt hiren Asaz muer vum Wieler besonnesch honoréiert gëtt. 

An Iech, léif Lieser, soen ech Merci fir Aeren Interessi an Aer positiv oder negativ Kritik! Muer decidéiert sech, niewent villen aneren a vill méi wichtege Saachen, och ob ech dëss Säit ka viru schreiwen oder ebe net.  Jiddefalls wor et fir mech eng nei an eng  flott Erfarung ë Blog ze schreiwen. An ouni interesséiert a kritesch Lieser ass natierlech kee Blog eppes wäert. 

Loosse mir zësummen eisem Land eng glécklech Zukunft wënschen!

Haut de Mëtteg am RTL-Background konnte mir verschiddenen Invitéën nolauschteren déi vun RTL invitéiert goufen Kommentaren iwwer déi „nationalistesch“ ADR-Walcampagne ze maachen. A flichtgeméiss hunn déi dräi dat gesot, firwat RTL se invitéiert hat.  Ee vun hinnen huet souguer sou eppes gesot wéi de Fändel wär net schéin ze kucke gewiescht….

Eise Leit vun RTL sollt ee mol kloer an däitlech soen, datt an all Land op der Welt politesch Parteien déi méi patriotesch wéi anerer sinn, och ganz selbstverständlech de nationale Fändel an hire Campagnen affichéieren: d’CDU an Däitschland, d’UMP a Frankräich an an Amerika „erdrénkt“ ee  bei den Demokraten wéi bei de Republikaner an engem Mier vu Fändelen.

Firwat hu sou vill Lëtzebuerger well e gestéiert Verhältnis zu hirem Fändel? Huet déi lénk a gréng Propaganda eis an all denen Joeren zënter 1968 lo scho sou conditionnéiert? Däerf een hei am Land net méi patriotesch sinn, mee nëmme nach internationalistesch an euro-federalistesch?  Ech si jiddefalls patriotesch, anti-federalistesch an houfreg op eise Fändel!

D’Wort huet haut op senger CSV-Propagandasäit wort.lu souguer dem Här Juncker säi Kapp an e Fändel agebaut. Dat muss allerdéngs en Iertum gewiescht sinn, well weder den Här Jucker nach d’CSV sinn och nëmmen am wäitste Sënn nach iergendwéi patriotesch. D’ADR ass et awer aus voller an éierlecher Iwwerzeegung!

Wann et drëm geet fir d’Relioun erof ze maachen, gëtt et jo an eiser Gesellschaft bekanntlech keng Grenzen an der Banalitéit oder der Oninforméiertheet vun der Argumentatioun. Sëcher gëtt et och formidabel Philosophen a Wëssenschaftler déi all Relioun a Fro stellen an och spezifesch d’Chrëschtentum intellektuell a moralesch eraus fuerderen. Mat hinnen muss a soll ee sech befaassen, mat där Karikatur vu Reliounskritik déi hei  am Land vun dene Lénke, Gréngen, Bloen a Roude kënnt awer net onbedéngt.

Ech verstoppe net meng grouss Bewonnerung fir de Poopst Benedikt XVI. Ech sinn iwwerzeegt, datt hien als ee vun dene gréisste Nofolger vu Péitrus iwwerhaapt an d’Geschicht ageet. Seng Bicher a Bréiwer si fir all Mënsch  –  a net nëmmen fir all Gleewegen – eng Invitatioun op eng spannend Rees an den Héichten vum mënschlechen Denken. Och nach am héigen Alter schreift den emeritéierte Poopst Bréiwer  déi duerch hir Eruditioun a Stringenz zu dem gehéieren wat een intellektuell opotmen léisst. Firwat loosse mir an eise Schoulen déi geeschteg Dimensiounen vun eiser Kultur an eisem Denken nëmme sou verkommen? 

De Bendeikt XVI. huet lo eng Aentwert op déi Reliounskritik a Bréifform vum italienesche Mathematik-Professer Piergiorgio Odifreddi, Caro Papa, ti scrivo,  geschriwwen. Well et einfach schéin ass, sou Texter ze liesen, ginn ech hei de Link un: 

 http://www.kath.net/news/43292

Lëtzebuerg huet jo versprach 60 syresch Réfugiéën opzehuelen, woumat och all politesch Parteien averstane sinn. 

An där leschter baussepolitescher Kommissioun an der Chamber, hat ech den Här Asselborn gebieden, datt mir syresch Chrëschten sollen ophuelen, wëll si net nëmmen ënner dem Krich leiden mee och déi am meeschte verfollegt reliéis Minoritéit am Noen Oste sinn. Et muss ee leider dovun ausgoen, datt Chrëschten a Syrien keng gesëchert Zukunft méi hunn.

Ausserdem wäre Chrëschten jo och liicht hei am Land ze integréieren, sollt hiren Openthalt méi laang daueren, wouvun ee jo muss vernënftegerweis ausgoen.   

Den Här Asselborn huet dat awer refuséiert. Hie wëll et dem UNHCR  iwwerloossen fir raus ze sichen, wéi eng Leit aus Syrien sollen op Lëtzebuerg kommen.  Dat bedaueren ech. Och do gëtt et en Ennerscheed tëschent der LSAP an der ADR: mir géngen sou Decisiounen selwer huelen a mir géngen déi syresch Chrëschten net am Stach loossen.

Lo grad hunn ech de Programm vun der „Maison de la laïcité“ gelies. Dat Ganzt nennt sech bistro-philo a wëll sech intellektuell ginn. E puer Zitater fir schéin ze maachen (André Gide, Henri Pena-Ruiz) an da fénkt  den Démontage un:

Démontage vun der Philosophie („La philosophie doit être sortie de sa tour d’ivoire, elle a une valeur pratique, (,…))  soss ass si jo wahrscheinlech näicht „wäert“.

Démontage vun der representativer Demokratie ( „l’idée mëme de la „démocratie représentative“ peut-elle avoir un sens?„).

Démontage vun eiser Natioun („Au Luxembourg (…) les habitants proviennent de (presque) tous les coins du monde. Plus de 44% n’ont pasa nationalité luxembourgeoise. S’y ajoutent chaque jour quelques 160.000 frontaliers qui viennent tous les jours de semaine et rentrent pour se reposer ainsi que les weekends. Et leur participation politique?“)     

Démontage vun der Famill („Mais aujourd’hui, la compréhension classique de ce qu’est resp. peut être une famille est en train d’être dépassée par les changements au sein de la société. Quelques mots clés ont changé la donne et profondément modifié l’image de la famille.“?)

A wahrscheinlech och nach en Démontage vun der Relioun an enger Diskussioun zum Thema „les cultes et la culture de l’au-delà„. Well schliesslech si mir an der „Maison de la laïcité“.

A bei all Kapitel froen ech mech: wéi eng Gesellschaft bidden déi lénk Stréimungen eis dann als Alternativ un? Wéi gesäit den historesche Bilan vun hirer Politik aus?  Wann si alles zerried an zerstéiert hunn, wat kënnt dann? D’Aentwert ass dach Chaos, Diktatur a Mënscheveruechtung! Déi Gesellschaften déi déi Lénk bis lo op der Welt opgeriicht hunn, woren dach een eenzegen Desaster. Hir Ideologien féieren an dee mënschlechen, moraleschen an an den economesche Ruin.

Ech verschléisse mech kenger Diskussioun. Déi haut dominant lénk Ideologien mat hirer virsätzlech gesellschaftszersetzender Wierkung  léise bei mir nach e gesonde Reflex aus: de Wonsch d’Demokratie, d‘ Natioun, d’Famill an de Glaawen ze schützen an ze verdeedegen!  

Et därf een den Architekte vun der Lénksdiktatur d’Feld net iwwerloossen! Déi puer Leit déi an eiser Gesellschaft nach konservativ Wäerter vertrieden, mussen och nees ze héiere sinn!

D’Tageblatt, eng Zeitung déi systematesch sou mëcht als geng et d’ADR net méi ginn, publizéiert och scho mol Artikelen an denen Iddien fir den Embau vu Kiirche ënner d’Leit bruecht ginn. Dat gëtt engem dann en „avant-goût“ op déi schéi nei Welt ënnert enger Lénkskoalitioun. Fir den Erhalt vun der Déifferdénger Kierch hat sech jo och just d’ADR agesat. 

Sou schreift z.B. eng LSAP-Kandidatin an engem Artikel vum 18. Oktober:

„Denn alle Kirchen haben eine bautypologische Eigenschaft: sie sind für die Aufnahme einer möglichst zahlreichen Besuchermenge eingerichtete Grossräume. Diese Eigenschaft teilen sie mit anderen Gebäudetypen wie Theatern, Konzertsälen, aber auch Sporthallen, so dass sich rein baulich gesehen die Nutzung einer Kirche für ein breites Spektrum unterschiedlicher Veranstaltungen oder Einrichtungen anbietet. (…)

In den Niederlanden dienen heutzutage einstige Kirchen als Skatehallen. Hier wird so den gewandelten Freizeitwünschen einer jüngeren Bevölkerungsgruppe Rechnung getragen. Dies sind nur einige wenige Beispiele, um zu zeigen, welche positiven Auswirkungen durch innovative Nutzung und qualifizierte Gestaltung möglich sind. (…)

Ich persönlich hoffe, dass der Nutzungswandel von Kirchen künftig stärker im Sinne einer nachhaltigen Stadtentwicklung erkannt und dam auch im öffentlichen Diskurs mehr Beachtung geschenkt wird. Und ich kann mir auch gut vorstellen, eines Tages hier in Luxemburg in einem modernen Restaurant zu speisen, eine Bibliothek zu besuchen oder ein Freizeitzentrum für Senioren, die in den alten Mauern einer Kirche untergebracht wurden.“

Fir de Fall wou et de Sozialisten nach u weidere „progressiven“ Iddien sollt felen, därf ech si drunn erënneren, datt hir kommunistesch Genossen d’Kierchen als Scheieren an als Ställ benotzt hunn.  Ech hoffe jiddefalls, datt net ee Chrëscht hei am Land de Sozialisten eng Stëmm gëtt!