Déi konservativ Säit

Beim Spiegel hunn ech gelies, datt e „Kongress fir d’Famill“ vun enger Zeitung organiséiert gouf op dem och eng russesch Parlamentarierin, d’Madame Elena Misulina, geschwat huet.

Well déi Thesen déi do vertruede goufen dene lénke Kreeser an hirer Press net passen, ass dem Spiegel säin Artikel erwaardungsgeméiss extrem negativ an eesäiteg. Dat ass natierlech säi gutt Recht. De Spiegel schwätzt vun enger „absurder Veranstaltung“.

Egal wat een dovun hällt – aanecht wéi de Spiegel halen ech sou e Kongress a priori fir absolut net „absurd“, ganz am Géigendeel –  muss een awer monéieren, datt en vu Rowdye gestéiert gouf. Vu Meenungsfräiheet, Toleranz an demokrateschem Pluralismus hunn déi lénk Kreeser net déi geréngsten Anung. De Spiegel schreift:

„Zumindest der Beginn der Konferenz „Für die Zukunft der Familie“ war spektakulär: Minutenlang dröhnte ein mächtiges Trommeln in Bauch und Ohren der Besucher. Dutzende Demonstranten bearbeiteten die Wand der Veranstaltungshalle im nebelverhangenen Schkeuditz bei Leipzig. „Eure Familie kotzt uns an“, hatten junge Leute aus dem linken Spektrum auf ihr Plakat geschrieben.“

http://www.spiegel.de/panorama/gesellschaft/compact-veranstaltung-krude-thesen-der-homosexuellenhasser-a-935310.html

Dat Zitat „Eure Familie kotzt uns an“ ass eng Beleedegung fir all déi Leit déi nach zu där traditioneller Famill stinn – an dat ass déi riiseg Majoritéit. 

Et gouf och op eng erbärmlech Manéier probéiert fir déi Leit déi sollten op dem Kongress schwätzen dovun ofzehalen. Sou gouf et z.B. eng Petitioun un d'“Auswärtige Amt“ fir der Madame Misulina iwwerhaapt d’Arees an Däitschland ze verbidden:

https://www.openpetition.de/petition/online/einreiseverbot-fuer-die-duma-abgeordnete-elena-misulina

Fir mech ass dat do déi perfekt Illustratioun vun där Intoleranz déi sou typesch fir déi lénk politesch Kreeser ass.

Lo, virun den Europawalen, gëtt jo gär sou gemaach als wär d’Eurokris bal gepackt. Et wär am Prinzip alles sou wäit stabiliséiert, an et bräicht ee lo just nach e bëssche méi europäeschen Zentralismus a Federalismus fir sou Krisen an Zukunft ze verhënneren. Dat ass natierlech net wouer, well d’Stabilitéitsinstrumenter an der Vergaangenheet wore scho staark genuch fir sou eng Kris kënnen ze evitéieren – si goufe just net agehal. Sou Leit wéi den Här Juncker oder den Här Frieden sinn dowéinst un der Eurokris mat Schold – well si hunn mat  bewierkt, datt déi Stabilitéitscritèren aus dem Maastricht-Vertrag net respektéiert goufen.

D’Problemer leien nach ëmmer an der Zësummesetzung vun der Eurozon, déi eng ganz Rei vu Memberlänner huet, déi bei wäitem net kompetitiv genuch sinn fir kënnen an enger Währungsunioun mat ze maachen. Dat ass e Politikum, datt och eng méi staark Kommissioun oder méi e staarkt Europäescht Parlament mat Sëcherheet net géng léisen – ganz am Géigendeel. Si géngen Eurobonden imposéieren – eng Kollektivéierung vun der Schold an eng forcéiert politesch Unioun géint de Wëllen vun den europäesche Vëlker!

Et ass heiansdo net oninteressant, fir méi al Interviewen ze liesen déi sech mat der Eurokris beschäftegen fir d’Entwécklungen iwwer d’Zäit besser ze gesinn. Hei ass z.B. en Interview mam Här Delors aus dem Joer 2011. Hie sot: „The finance ministers did not want to see anything disagreeable which they would be forced to deal with„. A sou wor et och!

http://www.telegraph.co.uk/finance/financialcrisis/8932640/Jacques-Delors-interview-Euro-would-still-be-strong-if-it-had-been-built-to-my-plan.html

Den 22. o9. 2011 huet de Poopst Benedikt XVI am Däitsche Bundestag eng – ech geng bal soen wéi ëmmer – formidabel Ried gehal. Eng Ried, déi ee sech a regelméissegen Ofstänn sollt ëmmer nees ukucken well ëmmer nei an aner Aspekter besonnesch aktuell a wichteg sinn.   

De Poopst kritiséiert zum Beispill dat réngt positivistesch Versteesdemech vun der Natur. Souwisou ass sou eng Approche fir ze méngen, datt d’Wëssenschaft kéint d’Relioun oder d’Philosophie ersetzen eng mënschlech Hybris an eng däitlech Iwwerschätzung vun de Méiglechkeeten vun der Wëssenschaft, jo souguer eng Verkennung vun der Finalitéit an der Methoud vu naturwëssenschaftlechem Denken iwwerhaapt.

Wou lo bekannt gouf, datt d’Gambisten de Reliounsunterrecht aus de Schoulen eraus huelen, hat ech e puer Kommentaren – ech mengen et wor op RTL.lu – iwwerflunn. Do stoungen da sou Topechkeeten wéi: „Keng Zauberer méi an der Schoul“. Leit déi sou eppes schreiwen, verstinn weder vu Philosophie nach vu Wëssenschaft iergend eppes. Virun allem awer hunn si net verstaan datt Wëssenschaft net kann an net däerf Selbstzweck sinn, mee e moralesche Referenzpunkt brauch, genee sou wéi och eis Mënschebild. Déi Verherrlechung vun der Wëssenschaft mat gläichzäiteger Verleegnung vu reliéisem Denken wäert de Mënsch net op, mee et erniddregt ën. D’Schoul gëtt ëm eng Dimensioun méi aarm, eis Kanner kréien eng Méiglechkeet fir hir Entwécklung geklaut.

De Wäerteunterrecht, den d’Relioun soll „ersetzen“, geet alléng net duer. Dat wat do geléiert gëtt ass zwar net ganz falsch, meee dacks banal a virun allem liicht mutéierbar. Eng Gesellschaft diktéiert Wäerter dacks méi wéi si op Waerter berout. Och d’Diktaturen hunn sech op „Waerter“ bezunn – just op falscher. Fir richteg Waeerter vu falschen ze ënnerscheeden brauch een dat jüdesch-chrëschtlescht Mënschebild, dat vun der Dignitéit vum Mënsch – vun all Mënsch – dat op der Gläichbildlechkeet mat Gott berout.        

Dat wat dëss Regierung an hir atheistesch Klientel vun AHA, etc ënner Fräiheet verkafen ass de Géigendeel – ee Schrëtt méi a Richtung Ofschaafung vum Meenungspluralismus an eng Lassléisung vun eiser Gesellschaft vun hire wichtegste kulturelle Wuerzelen.

Ee Schrëtt méi an d’Dikatur.

Gëschter Owend wor an der Stad e ganz interessante Viirtrag vum Här Philippe Arino, ee bekannten Aktivist an der Bewegung „la manif pour tous“, déi sech exemplaresch géint d’Homo-Bestietnis a Frankräich engagéiert. Well de Viirtrag intelligent an interessant war, hunn ech selbstverständlech  net een (NET EEN!!!) Vertrieder vun der lëtzebuerger Press do gesinn. Déi schreift jo nëmme politesch Korrektes.

Den Här Arino jiddefalls huet mat vill Engagement säi Standpunkt presentéiert, ënner anerem och iwwer d’Homophobie. Hien huet kloer an däitlech gesot, dat de Virworf vun der Homophobie vun den Homo-Lobbyen virun allem benotzt gëtt, fir d’Géigner vun hire Fuerderungen ze discreditéieren: Zensur duerch psychologeschen Drock. Fir hien ass Homophobie ze gesinn, wann et e konkreten „Acte“  ass, wéi z.B. eng Agressioun, net awer am Beräich vun enger politescher Diskussioun iwwer d’Homo-Bestietnis. Säi Buch zu dem Thema (v. infra) nennt ën „Manuel pour lutter vraiment contre l’homophobie“.

Déi militant Homosexuellebewegungen reprochéieren dem Här Arino souguer selwer „homophob“ ze sinn. Bei him géng et sech ëm eng „homophobie intériorisée“ handelen, duerch déi hien sech géng selwer haassen. Den Androck huet den Här Arino awer net op mech gemaach. Bei sech selwer huet den Här Arino och kee sou e Phänomen diagnostizéiert. 

Hien huet och déi Meenung vertrueden, datt e Bestietnis nëmme Sënn bei der Verschiddenheet vun de Geschlechter gëtt, „gekréint duerch d’Léift“.

Ech recommandéieren hei gär dem Här Philippe Arino seng Bicher:

„L’homophobie en vérité“, Frédéric Aimard éditeur, ISBN: 979-10-92770-00-1

„L’homosexualité en vérité“, id., ISBN: 978-2-9536078-8-8.

Déi zwee Bicher hu gëschter jiddereent 10,50 Euro kascht. Si sinn allen zwee 95 Säiten laang.

Eng Rei Firmaen déi Spillgezei verkafen gi well „gegendert“ Katalogen eraus: op de Biller spillen d’Jongen mat Meedercherspillgezei an ëmgedréint. An der Wierklechkeet ass dat extrem rar, well Jongen a Meedercher ebe vu Natur aus aanecht sinn an sech a villerlee Hinsicht fir aner Saachen interesséieren.

Ech verweisen an dem Zësummenhank op de Film vum Här Eia op dësem Blog beim Artikel „Girls’Day, Boys‘ Day, Nonsense Day“.

Eng vun dene Firmaen déi dat maachen ass déi franséich Firme „Système U“:

http://fr.wikipedia.org/wiki/Syst%C3%A8me_U

an hei ass e Reportage iwwer dee Katalog:

http://www.lamanifpourtous.fr/fr/toute-la-presse/941-un-catalogue-de-noel-unisexe-cree-la-polemique

Ech menge net, datt déi Firma hei am Land vertrueden ass. Jiddefalls géng ech meng Cadeauen net dohi kaafe goen, mee nëmmen an anstänneg, genderfräi Geschäfter. 

Et ass a mengen An ëmmer wichteg op déi natierlech Verschiddenheet a wonnerschéin Komplementaritéit vun denen zwee Geschlechter opmierksam ze maachen an all Ligen-Ideologie ze bekämpfen déi d’Natur vum Mënsch verleegent.

Aktualiséierung (24.11.13)

an hei nach eppes aus Amerika:

http://www.rue89.com/rue69/zapnet/2013/11/24/3-filles-puissantes-vues-8-m-fois-6-jours-youtube-247810?device=pc

D’Barbarei an Holland an an der Belsch fir krank Kanner a Behënnerter ze ermuerden huet jo och zu Lëtzebuerg eng ganz Rei Unhänger. Anscheinend gehéiert och RTL zu denen. Wann ech mir de Reportage op RTL unhéieren, da mierken ech dat do sou Ausdréck gebraucht ginn, wéi datt d’Euthanasiegesetz „en faveur“ vun de Kanner soll ausgedehnt ginn. Den RTL Interviewpartner wor och ganz eesäiteg erausgesicht: de President vun der pro-Euthanasie-Bewegung. E Géigner vun der Euthanasie, wéi z.B. déi kathoulesch Kierch oder e Spezialist an  der Palliativmedizin, gouf schonn iwwerhaapt net gefrot. RTL eben, Objektivitéit a journalistesch Qualitéit a Vollendung.   

http://news.rtl.lu/news/international/487921.html

An der Belsch selwer hunn d’Kierchen an d’Reliounscommunautéiten hir Oppositioun wësse gelooss:

http://www.lalibre.be/debats/opinions/les-chefs-religieux-en-belgique-parlent-d-une-meme-voix-de-l-euthanasie-527b902335703e420f414851

Hei am Land huet déi grénglackéiert Faschistepartei  jo schonn hei an der Chamber proposéiert fir scho gebuere Kanner ëmzebréngen a kéngesfalls nëmmen där vu 16 oder 17 Joer. Dozou gëtt et e Bäitrag op dësem Blog. Ech hat dat deemols kritiséiert an dat halleft Parlament, déi ganz zukünfteg Gambia Koalitioun plus déi Lénk, sinn aus der Chamber erausgelaf (Bäitrag op dësem Blog: „Gréng-roude Faschismus“).

Déi Blo sinn zwar deemools solidaresch mat eraus gelaf, mee ech freeë mech awer fir festzestellen, dat et an där bloer Partei eenzel Géigner oder wéinstens mol kritesch Stëmmen géint d’Kanner- an d’Behënnertenermuerdung gëtt. Gëschter kruut ech zwee Linken op dee lëtzebuergesche Blog „L for Liberty“ geschéckt fir déi ech dankbar sinn an déi ech och gär hei publizéieren.

http://lforliberty.wordpress.com/2013/11/20/sterbehilfe/ 

 http://lforliberty.wordpress.com/2013/10/03/doppelte-perversion/

Fir de Fall wou d’Gambia-Koalitionären nach net mat hirem Programm fäerdeg wären, kënnen si sech jo hei inspiréieren:

http://de.wikipedia.org/wiki/Kinder-Euthanasie

Lo kontestéiert souguer schonn e fréieren EU-Kommissar, den Här Frits Bolkestein, déi aktuell Europapolitik a besonnesch den Euro. Hie recommandéiert sengem Land, Holland, aus dem Euro eraus ze goen.

Zësummen mat anere Spëtzenéconomisten huet hien och en Appel fir eng Reform vum Euro ënnerschriwwen.

http://deutsche-wirtschafts-nachrichten.de/2013/04/11/ehemaliger-eu-kommissar-niederlande-muessen-so-schnell-als-moeglich-raus-aus-dem-euro/comment-page-3/

http://www.unzensuriert.at/content/0014255-Europ-ischen-Spitzen-konomen-fordern-Ende-des-Euro

Ech notéieren, datt hei am Land alléng d’ADR sech mat dësen Entwécklungen an Europa beschäftegt. Déi aner Parteien maache nach ëmmer sou, wéi wann am europäeschen Haus alles an der Rei wier. Dat ass awer absolut net de Fall!

Tatsaach ass, datt den Euro, dee joerelaang nëmmen duerch  Vertragsverletzungen a Ligen iwwerlieft huet, amgaangen ass déi Europäesch Unioun ëmmer méi ze splécken. Dat läit awer net an eisem nationalen Interessi also musse mir no Léisunge sichen. 

Déi Grondviiraussetzungen fir an Europa eng Währungsunioun kënnen op laang Siicht duerchzehalen, dorënner e komplett liberaliséierte Bannemaart, existéieren nët. Et wär och vollkommen onrealistesch fir ze mengen, datt sou e Bannemaart um Verhandlungswee ze ereeche wär. Den Här Bolkestein selwer huet jo zu dem Thema vill ze verzielen, wéi och zu Recht an engem vun denen zitéierten Artikel gesot gëtt.

Mir mussen also aner, méi realistesch Léisungen ënnersichen. D’Opdeelung vun der Eurozon ass ee vun dene Weeër déi mussen diskutéiert ginn. Mee och hei zu Lëtzebuerg musse  mir sou lues mat där Diskussioun ufänken. De Kapp an de Sand stiechen an hoffen, datt alles gutt geet, ass  mat Sëcherheet keng Optioun. Dofir ass eis Währung vill ze vill wichteg!

Gëschter owend wor alt nees een vun denen Owender dee mech un dësem Land verzweifele léisst. Den Ombudscomité fir d’Rechter vum Kand (ORK) hat säi Rapport virgestallt. Fänke mir mol mat dem Positiven un : gutt ass et, datt et sou e Gremium gëtt an dankbar sinn ech, datt Leit sech a sou Instanzen engagéieren. Déi aktuell sechs Memberen vun dem Comité hunn dann och gëschter owend betount wéi wichteg datt Kanner hinne sinn.  Gutt sou !

D’Presentatioun  wor dem Zäitgeescht entspriechend flaach. Ech sinn ebe konservativ a mech stéieren scho sou « Kléngegkeeten » wéi datt keen vun denen dräi Hären am ORK eng Cravate un hat. Am Ausland wär dat ganz einfach ondenkbar. Ech hat eng Cravate ugedoen aus Respekt virun denen Leit déi do hire Rapport wëlle presentéieren an éierlech gesot erwaarden ech mir déi selwecht Héiflechkeet vun dene Leit am Comité géintiwwer denen déi sech deplacéieren fir nolauschteren ze kommen. Soss kënne mir dat Ganzt jo och direkt als Pyjamaparty opzéien.

Lo zum Rapport selwer. Et gëtt eng Rei gutt Propositiounen an och eng Rei Iddien déi ee sollt diskutéieren, ë. a.: de Statut vum ORK kann iwwerschafft ginn, d’Presentatioun vu sexualiséierte Kannerbiller um Spaweck muss kritesch iwwerpréift ginn, elektronesch Spiller fir Erwuessener solle net a Geschäfter lafen an déi Kanner Zougank hunn, bei Premium SMS muss de Schutz verstäerkt ginn (zu dem Sujet hat ech de 26. Juni 2013 schonn d’Question parlementaire Nummer 2724 gestallt).  Besonnesch gutt ass, datt den ORK ob d’Bäibehalen vum Ausdrock « autorité parentale » insistéiert (dozou och en Artikel op dësem Blog  iwwer déi sougenannten  « responsabilité parentale »).

Awer lo ginn ech brutal: wat steet an dem Rapport awer och soss fir e geeschtegen Aarmutt ! Amplaatz d’Kannerrechter ze verdeedegen leeft den ORK dacks nëmmen dem Zäitgeescht no.  

Souwäit ech gesinn hunn – sauf erreur de ma part – kee Wuert iwwer de Schutz vun denen ongebuerene Kanner.

Kee Wuert iwwer d’Genitalmutilatiounen bei de Jongen (woubäi ech ausdrécklech begréissen, datt iwwer dee weibleche Pendant geschwat gëtt).

Bei der Gewalt doheem gëtt dee primitivsten a pauschalsten Discours vun de feministeschen Organisatiounen ouni kritesch Reflexioun einfach iwwerholl, inklusiv der Equatioun « témoin = victime ». Den ORK iwwerhëllt déi Texter bis hin zu der Ausklaamerung vun de männlechen Affer. Op der Säit 36 steet z.B. : « En effet, des enfants sont des victimes directes de la violence conjugale, au même titre que les femmes violentées .»   Dat si gläich zwou intellektuell Onéierlechkeeten  an engem Saz. Dat ass mir ë bësschen ze vill. An dem Rapport gëtt et mol net den Ufank vun enger  Evaluéierung  wat dann eventuell wierklech am Interessi vun de Kanner a sou enger Situatioun ass a wat net.

Déi selwecht total geeschteg Abstinenz fënnt een am Kapitel iwwer d’Filiatioun. Beim Homo-Bestietnis kann ee liesen :  (le) «cadre légal doit suivre l’évolution de la société ». Do geet vun de Kannerrechter keng Rieds méi !!!! Réngen Opportunismus a Konformismus !! Ass déi do „évolution de la société“ da vläicht am Interessi vun de Kanner? Oder vun eiser Gesellschaft?

« Le recours à la PMA devrait être possible pour tous les couples, hétérosexuels, homosexuels, mariés, pacsés ou non ».

On y est ! Le droit A l’enfant pour tout un chacun au lieu des droits DE l’enfant. An dat vum ORK !!!  Eéerlech gesot : ech géng dee ganze Comité direkt entloossen.

An da wëllen déi Dammen an Hären och nach Elementer vum islamesche Recht an eiser Legislatioun ophuelen. Mir sollen iwwer d’Kafala legiferéieren. Ma dat kënnt iwwerhaapt net a Fro ! Firwat net gläich déi ganz Scharia ? Argumenter fënnt een jo bekanntlech ëmmer !

Den Haaptsujet vum Owend wor d’Migratioun. An och hei läit den ORK komplett doniewent. Ech zitéieren hei de Kommentar vun engem Här den, wéi ech, entsat ass an dee mir de Moien zu dem Thema geschriwwen huet :

« D’Kanner leide sëcher ënnert der Situatioun vun hiren Elterern dei Asyl ufroen.

Mee tëschent de Linnen liesen ech duerch esou eng Tournuren wei d’Balance sollt emmer zugonschten den Kanner sinn, datt bei Asylverfahren d’Kanner vun den demandeurs d’asile « Zuenglein an der Waage » solle hinn. Mat aller Léift an allem Versteesdemech fir d’Kanner an hir Problemer, kann et dat net sinn. Een Asylverfahren ass nun eemol een Asylverfahren an eenzeg déi Decisioun doriwwer sollt entscheedend sinn. Kanner sollten keen Instrument duerstellen fiir een Asylverfahren ze beaflossen, soss leescht een genee dem Vorschub wat den Ombudskomitee uschwätzt, naemlech dei mësslech Situatioun vu Kanner a sou Verfahren. Kanner sollten bei Asylverfahren net instrumentaliseiert ginn. Genee dat ass awer an der Konsequenz d’Resultat vun den gudden Intentiounen vum Ombudskomitee. »

Mat där Analys sinn ech d’accord. E bësschen méi Realismus, verdéifte Nodenken an  méi Discernement géng dem ORK sëcher gutt doen.

Am Résumé : e puer gutt Iddien, mee am Groussen a Ganzen en ORK dee sénger Aufgab bei wäitem net gewuess ass, trotz aller gudder Intentiounen.

Gëschter gouf am Europäesche Parlament (EP) scho nees iwwer iwwer d’Sëtzfro vun där Institutioun debattéiert. Dat ass awer eng Decisioun déi prinzipiell de Regierunge virbehal ass a net dem EP, mee dat huet sech souwisou nach ni u sou juristesch-institutionnelle Aspekter gestéiert. D’EP hëllt fir sech an Usproch iwwer dem Gesetz ze stoen.

http://www.europarl.europa.eu/news/de/news-room/plenary/2013-11-18/3

http://www.europarl.europa.eu/news/de/news-room/content/20131118IPR25529/html/MEPs-call-for-a-treaty-change-to-allow-Parliament-to-decide-where-it-sits

Fir Lëtzebuerg ass dat natierlech eng ganz wichteg Fro, wëll wa mir Stroosbuerg opginn, da wanderen och déi Institutiounen déi hei zu Lëtzebuerg sinn, un éichter Plaz d’Sekretariat vum EP, lues a lues all op Bréissel. Et wär also normal, datt déi sechs lëtzebuergesch Europadeputéiert géngen alleguer fir Lëtzebuerg stëmmen.

Abee, dee gréngen Deputéierten Claude Turmes huet dat awer net gemaach! Den Här huet sech enthal. Fir mech ass dat typesch fir dat wat vun dene Géngen ze erwaarden ass: näicht wéi Verrot! Wéi soen dach déi Jonk Gréng scho sou schéin:  „De Patriotismus huet näicht méi hei zu Lëtzebuerg verluer„. Den Här Turmes lieft dat exemplaresch vir!

An dësem Dokument fannen sech d’Voten vun eisen Deputéierten op de Säiten 188 an 189.

Seat of the European Parliament

  Hei ass dee betreffenden Auszuch vun den Enthalungen: “

  ALDE:          Bennahmias, Crowley, Goulard, Hellvig, Kozlík, Vălean

 ECR:            Češková

 EFD:            Agnew, Batten, Clark, Helmer

 GUE/NGL:  Angourakis, Toussas

 PPE:            Balz, Bauer, Buzek, Carvalho, Casini, Dehaene, Gál, Gáll-Pelcz, Jahr, McGuinness, Mitchell, Siekierski, Urutchev, Vaidere, Zver, Zwiefka

 Verts/ALE:  Cohn-Bendit, Grèze, Jadot, Rivasi, Turmes“

Déi tierkesch Agence Anadolu weist dësen interessanten Interview mam lëtzebuergeschen Bausseminister Jean Asselborn:

http://www.aa.com.tr/en/mod/video-gallery/1967101/stopping-turkeys-eu-process-a-big-mistake-says-luxembourg-fm

Den Här Asselborn mengt et wär en „enorme Feler“  den tierkeschen  Bäitrëttsprozess ze stoppen. Dee Prozess wär am Interessi vun der EU an vun der Tierkei. Et ass mir awer net ganz kloer wou den Interessi vun engem tierkesche Bäitrëtt fir d’EU kéint leien, ausser am réng economeschen Beräich, an dofir brauch een d’Tierkei jo bekanntlech net als Memberstaat opzehuelen.

Op eise Bausseminister a senge Gespréicher wuel och d’Existenzrecht an déi territorial Integritéit vun der Republik Zypern ugeschwat huet?